රට වැටී තිබුණු අගාධයෙන් ගොඩගැනීමේ අභියෝගාත්මක ඉලක්කයේ, නිවැරදි මාවතට අපි දැන් පිවිස සිටිමු. පසුගිය වසර දෙක තුළ, අපේ රට ලබා ඇති ප්‍රගතිය ඊට සාක්ෂි සපයයි. අපි සියලු දෙනා මේ වෙනුවෙන් කළ කැපකිරීම්වල ප්‍රතිඵල අපේ අනාගත පරම්පරාවට උරුම කළ හැක්කේ මේ ගමන ඉදිරියටම යෑමෙනි.
ඉදිරි ජනාධිපතිවරණයේ, අපේක්ෂකයකු ලෙස මා ඉදිරීපත් වන්නේ, දේශයේ අනාගතය ගොඩ නැංවීම සඳහා මේ නිවැරදි මාවතේම ඉදිරියට යාම සඳහා වන බැවින් මාගේ සැලසුම හා දැක්ම සඳහා ඔබේ සහය පතමි.
ඔබේ සහයෝගයේ ශක්තිය ද සමග අපට මේ අසීරු වැල් පාලම තරණය කරමින් සංවර්ධිත රාජ්‍යයක මට්ටමට ශ්‍රී ලංකාව ඉහළට ඔසවා තැබිය හැකිය. සංවර්ධනයේ අස්වැන්නෙන් දේශයේ සියලු ජන කොටස් පෝෂණය කළ හැකිය.
ඉතින්, අපගේ ආදරණීය මාතෘ භූමියේ සියලු වැසියන්ට, යළිත් සෞභාග්‍ය උදා කරවන ඉදිරි ගමනට එක්ව අත්වැල් බැඳගන්නා මෙන් ඔබ සැමගෙන් ඉල්ලා සිටිමි.
